Os martes, 20 e 27 de outubro, ás 17.45h na biblioteca do Ateneo (Praza de Salvador Parga, 4-2º) terán lugar as dúas primeiras sesións do Club de lectura, co inicio do bloque «Leccións do salvaxe», na que se comentará a obra Sobre los huesos de los muertos de Olga Tokarczuk.

Janina Duszejko é unha enxeñeira de camiños retirada que ensina inglés na escola rural de Kotlina Kodzka, unha rexión montañosa do suroeste de Polonia. Cando a rutina dos seus habitantes se ve sacudida por unha serie de asasinatos que teñen como vítimas a varios cazadores furtivos, Janina, apaixonada da astroloxía, defensora a ultranza dos animais e obsesionada pola obra do poeta William Blake, intentará resolver pola súa conta os misteriosos crimes. Baixo a forma dunha novela policíaca e cun orixinal subtexto ecoloxista, Tokarczuk retrata soberbiamente a sociedade local, cuestionando tanto a falta de respecto pola natureza como o radicalismo ambientalista, nunha das obras máis poderosas e orixinais da literatura europea actual.

Olga Tokarczuk (Sulechów, Polonia, 1966) é unha escritora e ensaísta polaca, autora de adaptacións escénicas, poeta e psicóloga. Gañadora do Premio Nobel de Literatura en 2018, tamén estivo nominada ao Premio Literario Internacional IMPAC de Dublín e obtivo o Premio Nike de Literatura en dúas ocasións. En 2010 foi galardoada coa Medalla de Prata Gloria Artis e en 2015 recibiu o premio da ministra de Cultura e Patrimonio Nacional á excelencia literaria. O seu traballo foi traducido a multitude de linguas.

PROTOCOLO SANITARIO (de obrigado cumprimento)