Continuando co seu obxectivo de promoción e apoio á literatura, un ano máis a Fundación Eugenio Granell organiza o Maratón de lectura que, este ano, marcado pola pandemia, cambia a súa data tradicional do mes de maio ao mércores 25 de novembro, coincidindo así coa semana de celebración do aniversario de Eugenio Granell.
A Fundación Eugenio Granell dedica este Maratón a Ricardo Carvalho Calero, dada a súa vinculación coa figura de Eugenio Granell, sumándose así á conmemoración do Día das Letras Galegas. E contando, nesta ocasión, coa inestimable colaboración da Real Academia Galega.
Eugenio Granell no seu libro Memorias de Compostela «visión orlada por estrellas, islas, árboles y antorchas», relata como coñeceu a Carvalho Calero e o capítulo titulado «Amistades» comeza cun pequeno texto dedicado a el, di Granell: «De Carballo Calero no recuerdo el nombre, pero no se me borró el prestigio de su estampa. Me asombraba su dominio de un horizonte cultural que me imaginaba inabarcable».
Como todos os anos poderedes achegarvos ao Museo de 11.00 a 14.00 e de 17.00 a 20.00 horas, a escoitar ou a participar lendo algún fragmento da obra do escritor seleccionado. Para facer máis doada a organización do acto, todos aqueles que desexen participar poden chamar aos teléfonos 981 572124 ou 981 576394 ou escribir ao correo electrónico: secretaria@fundacion-granell.org, indicando a hora á que lles gustaría intervir.
Dadas as circunstancias que estamos a vivir por mor da Covid 19, seguiremos as instrucións sanitarias vixentes nese momento para a celebración presencial da actividade e, como novidade, abrimos a convocatoria para
participar telemáticamente. Poderanse enviar as lecturas nun audio ou vídeo ao e-mail: secretaria@fundaciongranell.org. A duración dos mesmos terá que ser de dous minutos (o vídeo non poderá exceder os 50MG) e deberán vir acompañados dun consentimento para o seu uso público, que empregaremos sempre co obxectivo de difusión e promoción desta actividade. O prazo para a presentación deste material comezaría o 19 de novembro e finalizaría o día de celebración do maratón, o mércores 25 de novembro.
comment closed