O mércores día 16 de marzo ás 20h celebrarase no Ateneo de Santiago (Praza de Salvador Parga, 4-2º) un Faladoiro titulado “Persoas en risco de exclusión social en Santiago”, que contará coa presenza de Sor Esther Seoane, Directora da Cociña Económica, e José Antonio Beiroa, Director de Cáritas de Santiago.

Nas sociedades sempre existen colectivos de persoas que por un motivo ou outro, sofren risco de exclusión social. Trátase de aqueles que pola súa condición social son total ou parcialmente excluídos dunha participación plena na sociedade na que viven. A exclusión social prodúcese principalmente, mediante a privación económica (desemprego, ingresos insuficientes…), a privación social (marxinación social, non participación nas actividades sociais, deterioro da saúde…) e a privación política (non participación nas actividades políticas, escasa representatividade política, falta de participación nas decisións que lles afectan persoalmente…). Algúns dos colectivos considerados en risco de exclusión social son internos e ex reclusos, toxicómanos e alcólicos en proceso de rehabilitación, minorías étnicas, perceptores da renda mínima de inserción, vítimas de violencia doméstica, xóvenes de 18 a 30 anos que estiveran tutelados pola Administración, inmigrantes alleos á Unión Europea e emigrantes retornados con graves necesidades persoais e familiares.

A Cociña Económica de Santiago é unha Institución Benéfica, que se creou no ano 1891 co obxectivo de favorecer e axudar á clase proletaria e indixente, proporcionándolle alimentación e dando educación e instrución a persoas que carecen dela.

Cáritas de Santiago é un organismo que dende 1955 serve á acción caritativa e social, axudando á promoción humana e ao desenvolvemento integral das persoas, grupos e comunidades. A tarefa de Cáritas consiste en acoller e acompañar ás persoas que se atopen en risco ou situación de exclusión social para que eles mesmos sexan os protagonistas do seu propio desenvolvemento integral, incluíndo a sensibilización social, para facer consciente á sociedade das distintas realidades de pobreza, a acción social, para axudar a que as persoas saian da realidade na que se atopan cara unha situación vital normalizada e a denuncia de situacións de inxustiza.